Kuch rishte ham iss duniya mein khud chunntay hein aur kuch rishte hame bane banaaye milte hein. Jo Rishte hame bane banaye milte hein jaise maa, baap, behn, bhai. In ko ham badal nahi sakte aur yahi hamaray kareeb hote hein. Pehlay to ye hamare naaz nakhre uthatein hein bachpan se, phir hame yakeen hojata hai kay yahi hamaray apne hein. Hame kisi na kisi tarha ye ehsaas hojata hai kay wo hamaray apne hein. Phir ham unse larte, jhagarte hein. Unke saath hasstay rotay hein. Lekin ham unhe kabhi kehtay nahi hein kay wo hamare liye kya hein aur unki ehmiyat hamaray dil mein kya hai. Shayad iss liye kay wo hamare itne kareeb hotay hein kay ham zaroori nahi samajhte. Ya shayad iss liye kay ham kabhi ye sochte he nahi kay wo hamse juda hojaeingay. Unhe roz roz dekh kar ham sochte hein kay inse to ham roz milte hein kissi aur ko milne ki kwahish hoti hai. Lekin phir aik aisa waqt aata hai kay hame uss apne se door hona parta hai. Kabhi aik ya do ghanton kay liye, kabhi kuch dino kay liye, kabhi kuch hafton kay liye, mahino kay liye, saalon kay liye ya phir hamesha kay liye! Tab hame ehsaas hota hai kay hamne kabhi unse kuch kaha he nahi. Jisske saath humne apni saari zindagi guzaari. Aur hamari duniya jisse suhani thi uss say ham apni dil ki do baatein an keh sake. Hame uss waqt uss insan ki kadar hoti hai jab wo saath nahi hota.

Kabhi Kabhi, kuch anjaanay log hame milte hein jo hamaray kuch nahi lagtay, phir unhe logon ki hamein aadat parr jaati hai. Jaise kay dost, colleagues, jinhe ham chahte hein etc....

Dheere dheere wo log jinhe ham jaante tak nahi thay wo hamaray apne ban jaate hein. Unki har khushi hame azeez hojati hai. Phir hame lagta hai kay ham unke bina nahi jee paeingay. Ajeeb hai na kay koi ajnabi apna kaise hojata hai?

In rishton ko ham khud chunte hein. Mera maan na ye hai kay agar insaan khud kissi aur ki achayion ko dekhe to har koi ussay acha nazar aayega. Ye apni apni nazar ki baat hai. Meri hamesha yahi koshish hoti hai kay mein logon ki achayion ko he dekhun chahe wo jaisa bhi ho jo bhi ho koi to hoga na jisse wo itna pyaar karta hoga kay sirf wohe jaanta hai. Aur wesay bhi ham kaun hote
hein kissi ko judge karne waalay beshak Allah Ta'la sab kuch dekh raha hai. Ham kyun kissi ko burra kahein shayad uss nay aisi neki ki huwi ho jisse Allah bohat khush ho aur kya pata wo insan nekiyon mein ham se bhi behtar ho. Ham kisi ki burayi kar ke gunah kyun karein iss se behtar hai kay ham uss insan ko samjhein aur uss ki achayion ko dekhein iss se hamein bhi sawaab milta hai. Aur doosron ko ham khush bhi rakh sakte hein.

Sorry mera blog thora lamba hogaya na? Agar meinay aap ko bore kiya ho to maaf karna. Dil ki baat thi na, iss liye likhti gayi. Shukriya mera blog parhne kay liye.




Aaj kay liye itna he kaafi hai, Allah Hafiz!

Bookmark: